ಮಾರಾಟಕ್ಕಿದೆ

 ಎಲ್ಲ ಮರೆತಿರುವಾಗ ಇಲ್ಲ ಸಲ್ಲದ ನೆವವ ಹೂಡಿ ಬರದಿರು ಮತ್ತೆ ಹಳೆಯ ನೆನಪೇ ....................

ಕಣ್ಣ ಹನಿಯೊಂದು ಕೆನ್ನೆಗೆ ಇಳಿದಿತ್ತು . ಛೇ ! ನಾನು ಹುಡುಗ ,ತಟ್ಟನೆ ಕಣ್ಣೊರಸಿಕೊಂಡೆ . ಮತ್ತೆ ಮತ್ತೆ ಕರೆವ ,ಕೊರೆವ ,ಕೆರೆವ ನೆನಪುಗಳ ಸಿಡಿಲಿಗೆ ನನ್ನ ಮನದ ಹೆಮ್ಮರ ಸುಟ್ಟು ಬೂದಿಯಾಗಿದೆ . ಅವಳೇ ನೆಟ್ಟ ಗಿಡವಾಗಿತ್ತಲ್ಲವೇ ಅದು ? ಆದರೆ ನೀರೆರದಿದ್ದು ನಾನು , ಕನಸಿನ ಪನ್ನೀರು . ಎಷ್ಟು ದೊಡ್ಡದಾಗಿ ಬೆಳೆದಿತ್ತು ಅದು ? ನನ್ನೆಲ್ಲಾ ಅವಲಕ್ಷಣಗಳ ಮರೆಮಾಚಿ ನಿಂತಿತ್ತು . ನನ್ನೆಲ್ಲಾ ಕೆಟ್ಟತನಗಳ ಹೀರಿ , ಸಿಹಿ ಫಲ ಕೊಡುತ್ತಿತ್ತು .

ಭೂಮಿ ನನ್ನ ಮಗಳು , ಅಲ್ಲಲ್ಲ ನಮ್ಮ ಮಗಳು . ಎಂತ ಮುಗ್ಧ ಮಗು ಅವಳು . ಅರ್ಧ ಚಂದ್ರದ ಹಾಲುಗಲ್ಲ , ತುಟಿಯಂಚಿನ ಕಿಲ-ಕಿಲ ನಗು , ಬಟ್ಟಲು ಕಣ್ಣುಗಳು . ಅಮ್ಮನಿಗಿಂತ ಅಪ್ಪನೇ ಇಷ್ಟವಂತೆ ! . ಅವಳಿಗೆ ಕಥೆ ಹೇಳಬೇಕೆಂದು ಎಷ್ಟು ಪುಸ್ತಕ ಓದಿದೆ ನಾನು ? ಉಹುಂ ಲೆಕ್ಕವಿಲ್ಲ . ಈ ಆಫೀಸು ,ಕೆಲಸ ಇವೆಲ್ಲದರಿಂದ ದಣಿದು ಬರುತ್ತಿದ್ದ ನನಗೆ ಅವಳ ನಗುವೇ ಮದ್ದು . ಕಾಫಿಯನ್ನೂ ಕುಡಿಯಲು ಬಿಡದೆ ಬೆನ್ನು ಹತ್ತಿ ಕುಳಿತು ಬಿಡುತ್ತಿದ್ದಳಲ್ಲವೇ ? . 

ನನ್ನ ಪ್ರೀತಿಯಲ್ಲಿ ಅದ್ಯಾವ ತಪ್ಪಿತ್ತು ? . ಅದೆಷ್ಟು ಮಳೆಗಾಲ ನಿನಗೆ ಕೊಡೆಯಾಗಿರಲಿಲ್ಲ ನಾನು . ನನ್ನ ಭೂಮಿ ಭೂಮಿಗೆ ಬರುವ ಮುಂಚೆಯೇ ನನ್ನ ಬಿಟ್ಟು ಓಡುವ ಜರೂರತ್ತು ನಿನಗೇನಿತ್ತು ? . ನಿನ್ನನ್ನು ನನ್ನ ಕಣ್ಣ ರೆಪ್ಪೆಯಲ್ಲಿಟ್ಟು ಕಾಪಾಡಿದ್ದು ತಪ್ಪೇ ? 

ಕಡಲ ಮೇಲೆ ಸಾವಿರಾರು ಮೈಲಿ ಸಾಗಿಯೂ 

ನೀರಿನಾಳ ತಿಳಿಯಿತೇನು ಹಾಯಿದೋಣಿಗೆ ? ....................

ನನ್ನ ಪ್ರೀತಿಯ ಆಳ ತಿಳಿಯುವ ಗೋಜಿಗೇ ಹೋಗಲಿಲ್ಲ ನೀನು . ಪ್ರಯತ್ನ ಮಾಡಿದ್ದರೂ ನಿನಗೆ ತಿಳಿಯುತ್ತಿರಲಿಲ್ಲ ಬಿಡು . ನಿನಗೆಲ್ಲಿತ್ತು ಅಷ್ಟು ಆಳಕ್ಕೆ ಇಳಿಯುವ ತಾಕತ್ತು ? . ನನ್ನ ಬಿಟ್ಟು ಹೋಗುವ ಕಾರಣವೇನಿತ್ತು ? ಅದ್ಯಾವ ಕಾರಣ ? 

ನಾನು ನಿನಗೆ ಎರಡನೆಯವನೋ , ಮೂರನೆಯವನೋ ಅಂತೆ , ಆದರೆ ಏನು ? . ಎಲ್ಲಾ ನೋವನ್ನೂ ಮರೆಸುವ ಸಾಮರ್ಥ್ಯ ನನಗಿತ್ತು , ಎಲ್ಲರನ್ನೂ ಎಲ್ಲವನ್ನೂ ಮರೆಸುವ ಶಕ್ತಿ ನನಗಿತ್ತು . 

ಪ್ರೀತಿ ತೆಗೆದುಕೊಳ್ಳುವುದಲ್ಲ , ಕೊಡುವುದು . ಹೇಗೆ ತಿಳಿಸಲಿ ನಿನಗೆ ? . ನದಿ ಹೇಗೆ ಹರಿದರೂ ಕೊನೆಗೆ ಸೇರುವುದು ಸಮುದ್ರವನ್ನೇ ತಾನೇ ? . ನನಗೆ ಕೇಳುವ ಅಧಿಕಾರವಿದೆ , " ನನ್ನ ಭೂಮಿಯನ್ನು ನನಗೆ ಕೊಡು , ಅವಳಿಗಾಗಿ ತಂದಿಟ್ಟ ಗೆಜ್ಜೆಗಳಿಗೆ ಸದ್ದು ಕೊಡು " . 

ಇಲ್ಲ ನೀನು ವಾಪಾಸು ಬರಲಾರೆ . ನನ್ನ ಭೂಮಿಯ ಮುಗಿಸಿಬಿಟ್ಟೆ ನೀನು . ಭೂಮಿಯೇ ಇಲ್ಲದ ಮೇಲೆ ಅವಳಿಗಾಗಿ ತಂದಿಟ್ಟ ಪಾದರಕ್ಷೆ ಇಟ್ಟುಕೊಂಡು ನಾನು ಏನು ಮಾಡಲಿ ? ಅದನ್ನು ನೋಡಿ ಮತ್ತೆ ಮತ್ತೆ ಬಿಕ್ಕಲೇ ? ಬೇಡ ನನಗದು ಬೇಡ . 

' ಮಾರಾಟಕ್ಕಿದೆ , ಬಳಸಿಯೇ ಇಲ್ಲದ ಮಗುವಿನ ಪಾದರಕ್ಷೆ .' 

(ಇದು ಬ್ಲಾಗಿಗರ ಖೋ-ಖೋ ಆಟ . ' ಮಾರಾಟಕ್ಕಿದೆ , ಬಳಸಿಯೇ ಇಲ್ಲದ ಮಗುವಿನ ಪಾದರಕ್ಷೆ ' ಎಂಬ Ernst Hemmingway ಅವರ ಕುಡಿಗಥೆಯ ಸುತ್ತ ಹೆಣೆದ ಕತೆ ಇದು.  ನನ್ನ ಸರದಿ ಮುಗಿದಿದೆ,  ನಾನು ಸ್ನೇಹಿತೆ ರಾಧೆಗೆ ಖೋ ಕೊಡುತ್ತೇನೆ.  ನೋಡೋಣ ಮುಂದೇನಾಗುತ್ತೋ? .   )