ಕಟ್ ಮಾಡಿದ್ರೆ - ಸ್ವಮೇಕ್ ಸ್ವಗತ

ಹೀಗೊಂದು ಸಂಭಾಷಣೆ
ಅಪ್ಪ : ಎಲ್ಲರಿಗೂ ಉಚಿತ ಹಾಗೂ ಕಡ್ಡಾಯ ಶಿಕ್ಷಣ ನೀಡುವುದೇ ಸರ್ವ ಶಿಕ್ಷಣ ಅಭಿಯಾನದ ಗುರಿ.
ಮುನ್ನಿ : ಎಲ್ಲರೂ ಅಕ್ಷರ ಕಲ್ತು ಕತೆ - ಕವನ ಬರಿಯೋಕೇ ಶುರು ಮಾಡಿದ್ರೆ ಏನಪ್ಪ ಮಾಡೋದು?
********* ಕಟ್ ಮಾಡಿದ್ರೆ ****************
ಅವನು ಪ್ರಸಿದ್ಧ ಲೇಖಕ. ಎಂತೆಂತದೋ ಪ್ರಶಸ್ತಿ ಎಲ್ಲಾ ಬಂದಿದೆ.
" ನೀನು ಏನ್ ಬರ್ದೆ? "
" ನೀನು ಏನ್ ಬರ್ದೆ? " ( ಎಕೋ ಎಫೆಕ್ಟ್)
ಒಳಗಿಂದ ಬಡಕೊಳ್ತಾ ಇದೆ.
*********** ಕಟ್ ಮಾಡಿದ್ರೆ **************
ಪ್ರಶಸ್ತಿ ಪ್ರಧಾನ ಸಮಾರಂಭ. ಅವರ ಪುಸ್ತಕಗಳು ಎಷ್ಟೋ ಜನರಿಗೆ ದಾರಿದೀಪವಾಗಿದೆಯಂತೆ, ಕತ್ತಲಲ್ಲಿ ಮೊಬೈಲ್ ಸಹ ಇಲ್ಲದಿದ್ದಾಗ ಅವರ ಪುಸ್ತಕ ತನ್ನನ್ನೇ ತಾನು ಸುಟ್ಟುಕೊಂಡು ದಾರಿದೀಪವಾಯಿತಂತೆ. ಸಮಾರಂಭದಲ್ಲಿ ಜನರಿಗಿಂತ ಪೋಲಿಸರೇ ಜಾಸ್ತಿ.
***********ಕಟ್ ಮಾಡಿದ್ರೆ ***************
ಅವನೊಬ್ಬ ಸೆಲೆಬ್ರಿಟಿ , ಅವನ ಹೆಸರು ಹೇಳಿ ಸೋಷಿಯಲ್ ಮೀಡಿಯಾದಲ್ಲಿ ಒಂದು ಚುಕ್ಕಿ ಇಟ್ಟರೂ ಸಾವಿರಾರು ಲೈಕ್, ನೂರಾರು ಕಮೆಂಟ್ ಗ್ಯಾರಂಟಿ.
" ಸಮಾಜಕ್ಕೆ ನೀನೇನು ಕೊಟ್ಟೆ ? "
" ಸಮಾಜಕ್ಕೆ ನೀನೇನು ಕೊಟ್ಟೆ? " ( ಎಕೋ ಎಫೆಕ್ಟ್)
ಅವನ ಮನಸ್ಸಾಕ್ಷಿ
********** ಕಟ್ ಮಾಡಿದ್ರೆ ****************
ಇಪ್ಪತ್ನಾಲ್ಕು ತಾಸಿನ ಟಿವಿ ಚಾನೆಲ್
" ನಗರದಲ್ಲಿ ಗ್ಯಾಂಗ್ ರೇಪ್, ಬನ್ನಿ ಹೆಚ್ಚಿನ ಮಾಹಿತಿ ತಿಳಿಯೋಣ ನಮ್ಮ ಪ್ರತಿನಿಧಿಯಿಂದ ,
ಈ ರೇಪ್ ಹೇಗಾಯ್ತು? ಯಾಕಾಯ್ತು? ಇದರ ಬಗ್ಗೆ ಮಾಹಿತಿ ನೀಡಿ. " ........ ಅಡಚಣೆಗೆ ಕ್ಷಮೆ ಇರಲಿ
ಇದೀಗ ಬಂದ ಸುದ್ದಿ , ಬ್ರೇಕಿಂಗ್ ನ್ಯೂಸ್
" ದೊಡ್ಮನೆಯಿಂದ ಹುಚ್ಚ ಸಂಕಟ್ ಔಟ್ , ನಿರೀಕ್ಷಿಸಿ ಬಿಗ್ ಡಿಬೇಟ್ " .
*********** ಕಟ್ ಮಾಡಿದ್ರೆ *****************
ಕೈಯಲ್ಲಿ ದಿನಪತ್ರಿಕೆ. ಕಲರ್ ಮುಖಪುಟ. ಎರಡು ದೊಡ್ಡ ಚಪ್ಪಲಿಗಳು
" ಸಾರಾಗಾನ್ ಚಪ್ಪಲಿಗಳು, ಸವೆಸಿದಷ್ಟೂ ಉತ್ಕೃಷ್ಟ "
ಎರಡನೇ ಪುಟದಲ್ಲಿ ಸಣ್ಣಗೆ ಹೆಡ್ ಲೈನ್ಸ್.
******* ಕಟ್ ಮಾಡಿದ್ರೆ ********************
ಐದು ಸಾವಿರ ಜನ ಇರೋ ಫೇಸ್ಬುಕ್ ಗ್ರೂಪು.
ಬೆಳಿಗ್ಗೆ ಆರು ಗಂಟೆಗೆ ಹೂವಿನ ಫೋಟೋ ಇರೋ ಪೋಸ್ಟ್ " Good morning have a nice
day " .
ನೂರು ಜನ ಇರೋ ವಾಟ್ಸಪ್ ಗ್ರೂಪು
" ಈ ಮೆಸೇಜ್ ಐವತ್ತು ಗ್ರೂಪ್ ಗೆ ಫಾರ್ವಡ್ ಮಾಡಿ ಎರಡೇ ದಿನದಲ್ಲಿ ಒಳ್ಳೆಯ ಸುದ್ದಿ ಸಿಗುತ್ತದೆ " .
*********** ಕಟ್ ಮಾಡಿದ್ರೆ ***************
ಪಾದಚಾರಿಗಳಿಗೆ ಹೆಲ್ಮೆಟ್ ಕಡ್ಡಾಯ . ಬುದ್ಧಿ ಹೇಳಿ ಪೋಲೀಸರಿಂದ ಫೀ ಕಲೆಕ್ಷನ್
************* ಕಟ್ ಮಾಡಿದ್ರೆ ************
ಈಗ ವಿಷಯಕ್ಕೆ ಬರೋಣ ( ಮೇಲಿನದು ಪೀಠಿಕೆನಾ ???? ಅಂತ ಗೊಣಗಬೇಡಿ) . ಈ ಬರವಣಿಗೆ ಎಲ್ಲರಿಗೂ ಬರೋ ಅಂತದ್ದಲ್ಲ ,ಕೆಲವೇ ಕೆಲವರಿಗೆ ಸಿದ್ಧಿಸುವಂತದ್ದು ಎನ್ನುವ ಒಂದು ಕಾಲವಿತ್ತು. ಬರವಣಿಗೆಯ ಗುಣಮಟ್ಟವೂ ಸಾಕಷ್ಟು ಚೆಂದವೇ ಇತ್ತು. ಸೋಷಿಯಲ್ ಮೀಡಿಯಾಗಳು ಬಂದ ಮೇಲೆ ಹಾಗಲ್ಲ. ಪೆನ್ ಇದ್ದವರೆಲ್ಲಾ ಬರಹಗಾರರು, ಕ್ಯಾಮೆರಾ ಇದ್ದವರೆಲ್ಲಾ ಫೋಟೋಗ್ರಫರ್ಸ್ . DSLR ಕೈಯಲ್ಲಿದ್ದರೆ ಮಂಗನೂ ತನ್ನನ್ನು ತಾನು ಫೋಟೋಗ್ರಫರ್ ಅಂದುಕೊಳ್ಳುತ್ತಂತೆ. ಇದರ ಮಧ್ಯವೇ ಒಳ್ಳೆಯ ಬರಹಗಾರರು, ಫೋಟೋಗ್ರಫರ್ ಗಳು ಸಿಗುತ್ತಿದ್ದಾರೆ. ಆದರೆ ಅಂತಹ ಮುತ್ತುಗಳನ್ನು ಹೆಕ್ಕುವುದೇ ಕಷ್ಟವಾಗಿದೆ.
ಸುಮ್ಮನೆ ಮನಸ್ಸಿಗೆ ಬಂದಿದ್ದೆಲ್ಲಾ ಗೀಚುವುದರಲ್ಲಿ ಅರ್ಥವಿಲ್ಲ. ಲೈಬ್ರರಿಯ ಒಂದಾದರೂ ಪುಸ್ತಕ ಜೀರ್ಣಿಸಿಕೊಳ್ಳದೆ ಹೇಗೆ ಬರೆಯಲು ಸಾಧ್ಯ ? . ಎಷ್ಟೋ ಜನ ರೈಟರ್ ಆಗಬೇಕೆಂಬ ಕನಸು ಕಟ್ಟಿಕೊಂಡಿದ್ದಾರೆ. ನನ್ನ ಕಿವಿ ಮಾತು ಇಷ್ಟೇ ಹೆಚ್ಚು ಹೆಚ್ಚು ಓದಿ .ಕೀರ್ತಿಯು ಉತ್ತುಂಗಕ್ಕೆ ಏರಿದಂತೆಲ್ಲಾ ನಾವು ಆಳಕ್ಕೆ ಆಳಕ್ಕೆ ಇಳಿಯಬೇಕು.
ನಮ್ಮೆಲ್ಲರ ಬ್ರೈನಿನ ರೈಟ್ ಹೆಮಿಸ್ಪಿಯರ್ ಸತ್ತು ಹೋಗಿದೆ .ಕ್ರಿಯೇಟಿವಿಟಿಯ ಕೊರತೆ ಎಲ್ಲರಿಗೂ.
ಸದಾ ಹೊಸತು ಹುಡುಕೋಣ. ಈ ಬದುಕಲ್ಲಿ ನಮಗೆ ಅರ್ಥವಾಗದ್ದು ಏನೋ ಇದೆ. ಅದನ್ನು ಅರಿಯೋಣ.
ಸೋಷಿಯಲ್ ಮೀಡಿಯಾವಿರಬಹುದು ಅಥವಾ ಮೀಡಿಯಾಗಳಿರಬಹುದು ಅದು ನಮ್ಮ ಕ್ರಿಯೇಟಿವಿಟಿಗೆ ಹಿಡಿದ ಕೈಗನ್ನಡಿಯಾಗಿರಬೇಕು. ಪಕ್ಕದ ಮನೆ ಮಗುಗಿಂತ ನಮ್ಮನೆ ಮಗು ಚೆಂದವಲ್ಲವೇ? ಸ್ವಮೇಕ್ ಗೆ ಆದ್ಯತೆ ಕೊಡೋಣ ( ಸುದೀಪ್ ನೆನಪಾಗ್ತಾ ಇದಾನಾ ? 😜) .
ಇನ್ನೊಂದು ವಿಷಯ ಬರೀ 'ಅವನು ', 'ಅವಳು ' ಸಾಹಿತ್ಯ ಓದಿ ಓದಿ ಬೋರ್ ಆಗೋಗಿದೆ .
ಏನು ಉಪಸಂಹಾರ ಬೇಕಾ ? ಕೊಡೋಣ ಅದ್ಕೇನಂತೆ.
Empty mind is devil's workshop ಅಂತ ಒಂದು ಮಾತಿದೆ. ಸೆಮಿಸ್ಟರ್ ಹಾಲಿಡೇಸ್ ನಂಗೆ ಈಗ . ಮೈಂಡ್ ಖಾಲಿ . ಸೋಷಿಯಲ್ ಮೀಡಿಯಾಗಳಲ್ಲಿ ಅದೇ ಮುಖ, ಅದದೇ ಪೋಸ್ಟು ನೋಡಿ ನೋಡಿ ಸಾಕಾಗಿದೆ. ರಾತ್ರಿ ಆದ್ರೆ ಸೀರಿಯಲ್ ಕಾಟ , ಲ್ಯಾಪ್ಟಾಪ್ ಹಾರ್ಟ್ ಡಿಸ್ಕ್ ಫುಲ್ಲು ಅದ್ರಲ್ಲಿರೋ ಸಿನೆಮಾ , ಟಿವಿ ಸೀರೀಸ್ ಎಲ್ಲಾ ನೋಡಿ ಆಯ್ತು .
ಯಾರಾದ್ರೂ ಹೊಸಾ ತರದ್ದು ಪೋಸ್ಟ್ ಹಾಕ್ರಪ ಕಾಯ್ತಾ ಇರ್ತೀನಿ.