ಮಳ್ಗವಿತೆ

ನಾನು ಹುಟ್ಟಿದಾಗ ಮನೆಯಲ್ಲಿ ಸಂಭ್ರಮವಿರಲಿಲ್ಲ
ಪಟಾಕಿಯ ಸದ್ದಿರಲಿಲ್ಲ, ಸೂಲಗಿತ್ತಿ ಹೇಳುವಳು
ಥತ್ ಇದೂ ಹೆಣ್ಣು

ಪೇಟೆಯಲ್ಲಿ ಮಿಠಾಯಿ ತುಟ್ಟಿಯಾಗಿದೆಯಂತೆ ಗೊಣಗುವರು ಅಪ್ಪ, ಹೆಣ್ಣಾಗಿ ಹುಟ್ಟಿದ್ದು ತಪ್ಪಾ?
ನಾಮಕರಣವೇಕೆ ಅನ್ವರ್ಥನಾಮ ಇರುವಾಗ
ಅಜ್ಜಿ ಚೀರಿದ್ದರು ' ಸಾಕು ' , ಸಾವಿತ್ರಿಯಾಯಿತು

ನಾನು ಮಾತ್ರ ಹೋಮ್ ವರ್ಕ್ ಮಾಡಿದ್ದೆ
ಹುಡುಗರಿಗೆ ಬೈದರು , ಹುಡುಗಿನೇ ಮಾಡಿದೆ ನಿಮಗೇನ್ರೋ?
ಪ್ರಶಂಸೆಯೋ? ತೆಗಳಿಕೆಯೋ?

ಹನ್ನೆರಡು ತುಂಬಿತ್ತು, ಮನೆ ತುಂಬಾ ಕಾವಲಿತ್ತು
ಕಾವಲಿಯ ಸುತ್ತ ನನ್ನ ಬದುಕು ಬೇಯುತಿತ್ತು
ಟಿನೇಜು, ಕಾಲೇಜು ಒಟ್ಟಿಗೆ ಕುಳಿತಿತ್ತು
ಒಂದೆರಡು ಹುಡುಗರ ಪಕ್ಕಕ್ಕಿಟ್ಟಿದ್ದೆ

ಚಿಲಕ ಜಡಿದ ಬಾಗಿಲು ದಾಟಿಕೊಂಡು ಒಳಗೇ
ಬಂದುಬಿಟ್ಟನೊಬ್ಬ, ನಿಟ್ಟುಸಿರು ಬಿಟ್ಟಿದ್ದೆ
ಕೊನೆಗೂ ಪ್ರೀತಿಸುವ ಜೀವ ಸಿಕ್ಕಿತೆಂದು
ಬಿಟ್ಟ ನಿಟ್ಟುಸಿರಿನ ಶಾಖಕ್ಕೆ ಹೆದರಿ ಓಡಿಹೋದನವ

ಮತ್ತೆ ನಾನು ಒಂಟಿ, ಮದುವೆಯಾದರೂ
ಇನ್ಯಾರದೋ ಹೆಸರಿನ ಅರ್ಧ ಭಾಗ ಹೊತ್ತು
ಮತ್ಯಾರದೋ ನೆನಪುಗಳ ಮೂಟೆ ಹೊತ್ತು
ನನಗೆ ನಾನೇ ಕರೆದುಕೊಂಡೆ 'ಸೂಳೆ '......